НИТХурлаас Улаанбаатар хотын гэр хороололд дахин төлөвлөлт хийхээр 7 хэсэгт барилга, орон сууц, түүнийг дагасан иж бүрэн бүтээн байгуулалт хийж, нийтдээ 12 шинэ хороолол босгох томоохон ажлыг өрнүүлээд байгаа билээ.Энэхүү ажлын хүрээнд нийслэлийн Баянзүрх дүүргийн 13, 14-р хорооны нутаг дэвсгэр буюу Нарантуул захын хойд хэсгийн гэр хорооллыг орон сууцжуулах ажлыг хийж гүйцэтгэхээр сонгогдсон Моннис Урбан Девелопмент ХХК болон Бүрд констракшн ХХК-иудын эхний ээлжинд ашиглалтанд оруулахаар төлөвлөж буй Б хэсгийн барилгын ажлын шав тавих ажиллагаа өнөөдөр Баянзүрх дүүргийн 14-р хорооны нутаг дэвсгэрт боллоо.

Шав тавих ажиллагаанд бүтээн байгуулалтын ажлыг хийж гүйцэтгэх 2 компанийн удирдлагууд, хотын захиргаа, дүүрэг, хорооны төлөөлөгчид оролцож нээлтийн тууз хайчиллаа.

Энэхүү Б хэсгийн 11 га талбайд нийтдээ 1900 айлын орон сууц, 2 цэцэрлэг, 1 сургууль, түүнийг дагасан ногоон байгууламж бүхий олон улсын жишигт нийцсэн цогцолбор хороолол сүндэрлэж иргэдийн тав тухтай аюулгүй амьдрах нөхцлийг бүрдүүлэх юм.