Өмнөговь аймгийн Гурвантэс сумын нутаг дэвсгэрт байрлах Нарийнсухайт – Шивээхүрэн чиглэлийн 43.2 км урт, 16.8 м өргөн, 3 эгнээтэй, том оврын автомашин зорчих аюулгүй байдлыг бүрэн хангасан, олон улсын стандартын хүнд даацын замыг Моннис Интернэшнл болон Саусгоби сэндс ХХК-ийн хөрөнгө оруулалтаар Ар Ди Си Си ХХК – концессын төсөл хэрэгжүүлэгч компаниас барьж дуусган, Улсын комисст 2014 оны 9-р сард амжилттай хүлээлгэн өгсөн.

Ар Ди Си Си ХХК нь Монгол Улсын Засгийн газрын 2011 оны 262 дугаар тогтоолын дагуу 2011 оны 10-р сарын 26-ны өдөр Төрийн Өмчийн Хороотой “Нарийнсухайт-Шивээхүрэн чиглэлийн хатуу хучилттай авто замын Барих-Ашиглах-Шилжүүлэх” концессын гэрээг байгуулсан бөгөөд Монгол улсын хэмжээнд байгуулсан концессын хоёр дахь гэрээ бөгөөд “Барих-Ашиглах-Шилжүүлэх” анхны концесс, Төр Хувийн Хэвшлийн Түншлэлийн хүрээнд амжилттай хэрэгжиж буй анхны төсөл гэдгээрээ онцлог юм.

Хуучин шороон зам нь инженерийн ямар ч байгууламжгүй, ус зайлуулах системгүй, засвар арчлалт тогтмол биш байснаас том оврын хүнд даацын тээврийн хэрэгсэл их явсанаас болж маш их хэмжээний тоос босож үзэгдэх орчин хязгаарлагдсанаас аваарь осол гарах, олон салаа зам гаргах, улмаар малын бэлчээр ургамлын хөрсийг сүйтгэж, ус хөрс агаарын бохирдол, дуу чимээ дээд цэгтээ хүрсэн байсан тул байгаль орчныг хамгаалж, нутгийн иргэдийн эрүүл, аюулгүй орчинд амьдрах нөхцлийг бүрдүүлэх зорилгоор Өмнөговь аймгийн Гурвантэс сумын нутаг дэвсгэр дэхь нүүрс тээвэрлэлтийн асуудлыг төрийн бодлогоор зохицуулж, концессын зам барих шийдвэрийг Засгийн газраас гаргасан.